Omar Haýýam Rubagylar

Meýhana meslerne baş serkerde men, Boş sözler sebäpli galan derde men, Ýürek gany bilen mynajat edip, Şeraba ýalbarýan gijelerde men.

Örän ýiti bir ýaragym bar elde, Ol täze bap açýar maňa her ýylda, Duşmanyň ýüregi kebapdyr menden, Kellesi hem şerabyma jam golda.

Şerabyň ýuwdumy deger jahana, Meý gabyň gapagy barabar jana, Meýli dodaklary süpüren ýaglyk Dogrudan, taý geler müň teýlesana.

Tagatdan gowudyr bir göwün alsaň, Ýagşydyr bilen hem meýlisdeş bolsaň, Bir göwne taý gelmez, ýüz palçyk Käbe, Haja neçüýn gidýäň, göwün tap, bilseň!

Ýas tutdy zamana, men mundan göçdüm, Çünki ýüz göwherden bir göwher seçdim. Haýyp, ýüz-müň inçe manyly sözi Ilde bilim az diýp, aýtman geçdim.

Arzuw etseň şerap bilen gözel ýar, Elmydam gözleseň gyjak hem dutar, Bularyň hiç biri esasy däldir, Din ýesirliginden çykmasň, sen har.

Bir gelen nobatdyr jahyllyk – nagtym, Meý içerin, çünki şatlykly wagtym, Aýp etmäň şeraby ajydyr diýip Onuňda sebäbi – ajydyr bagtym.

Bulguryň içinde gyzyl meý ýagşy Gyjakly, dutarly meýlis, toý ýagşy. Şerabyň keýpinden habarsyz sopy Müň agaç daş bolsun bizden goý, ýagşy.

Diýýärler;Jennet bar, hüýr bar hem köwser, Ol ýerde şeraplar reňbe-reň öwser», Nagtyndan dolduryp, äber käsäni, Ol nesýe – ýylandyr, üstüňe towsar.

Durmuşyň syrlarna düşünsek eger, Ölüm syrlarny-da adamzat biler, Bu gün dirilikde bir zat bilmeseň, Erte ölenden soň – ne bilmek bolar? ===========0 Eý köňül, nesibiň…

Eý saky, ýatlama hadys-aýaty, Meýhana meý diýip ýazgyn bir haty, Biz üçin şol hatyň ýetişen güni Gadyr gijesinden gadyrly gaty.

Gaýgy-gam elinden içmezden şerap, Şerbet içe bilmen toý-meýlis guran, Nanymy batyrman kimsäň duzuna Owal ýüregimden eýlemän kebap.

Göwnüňe gaýgy-gam ýygnansa – çek meň, Ýa-da bir pyýala şerap iç, gül reň, Meý çekmeseň, meý içmeseň, eý akmak, Saňa laýyk daşdyr, daş iç-içmeseň.

Her kime syrymdan gep aça bilmen, gysga sözlüdirin, köp saça bilmen, aýdyp bilmeýärin hal-ahwalymy, gizlin syrlarym bar, leb aça bilmen.

Jahana ýetsedi mendäki kuwwat, Bu harap düzgüni ederdim berbat, Ýaňadan salardym şeýle bir dünýä, Adamlar islegne ýeterdi aňsat.

Meçjitden, namazdan söz açma bize, Mes bol meýhanada, uýma boş söze, Şerap iç, eý Haýýam, erte gumuňdan Käte jam ýasarlar, käte hem küýze.

Meý bilen täret gyl, meý bolan ýerde, Ýaman ýagşy bolmaz, ýazylgy serde, Şerap ber, gaýtadan ýamar ýaly däl, Örän zor ýyrtyldy sopulyk perde.

Meýliňçe bolmansoň dünýäniň käri, Bihudadyr pikriň-aladaň bary, Giç gelip-ir gitdik diýip, elmydam Biderek çekýäris gaýgy-azary.

Orazadyr, namaz göwnüme ýarap, Islegim bitdi diýp ýörerdim garap, Haýyp, ol täreti bir ýel syndyrdy, Orazamy bozdy bir ýuwdum şerap,

Şerap aşyklara deňizde saldyr, Meý akyl gyzynyň ýüzünde haldyr, Oraz aý içmedik, geçdi bihuda, Başram gijesidir, içsek halaldyr.

Ýeke kerpijim-de bolsa, men ony Ady ýaman meýe çalşaryn göni, «Hany ertirlige puluň?» – diýseler, Merýem dokan däldir selledir, dony.

Arman, bu ömrümiz geçdi biderek, Ajalyň elinden gandyr köp ýürek, Geçenleň halyny soraýyn diýsem, Gidenlerden ne nyşan bar, ne derek.

Bir ýaryň yşkynda ýanmasa ýürek, O hili ýürege «waý!» diýmekgerek. Ömrüňde şerapsyz geçse bir günüň – Ýokdur şol günüňden geçen biderek.

Bu gysga ömrümde men gamgyn bolman, Meýlisden, şatlykdan özge zat bilmen, «Alla saňa ynsap bersin» diýýärler, onuň öz-ä bermez, berse-de alman.

Diýýärler;Hezildir hüýr bilen jennet Men diýýän;Bar zatdan şerapdyr gymmat». Uzakdan hoş geler depregiň sesi, Nagtyny al, çekme nesýeden minnet.

Düýn agşam meý gaby urdum bir daşa, Serhoşdym men şonda, içipdim aşa, – Men-de, sen ýalydym, sen hem bir zaman Bolarsyň men kimin – diýdi…

Eý söýgülim, göwnüm üçin gel bäri, Islegmizçe çöz sen bir müşgil käri, Palçygmyzdan küýze ýasalmazdan öň Bir küýze meý getir, bar, biziň sary.

Gaýgy-gamy hergiz başa getirme, Hasrat çekip, laýa batyp oturma, Kitapdan, gözelden, gülzardan geçme, Şat geçir ömrüňi – gapyl ötürme.

Gözlerim syn edip her ýana bakar, Behiştdir – göklük düz, köwserdir – akar Söz açma dowzahdan, jennetdir – sähra, Otursaň ýar bilen janyňa ýakar.

Her kim öz şertinde berk dursa zyýat, Gül reňkli şerapdan dänmez ol aňsat, Oraz aý şert eden meý içmezlige, Namaz-orazadan goý bolsun azat!

Jahanda hakyky mahluk adamzat, Her kimiň pähmine girmez bu aňsat, Aňlaýyş meýinden bir ýuwdum içseň, Saýgarsyň mahlugyň haýsy kem, zyýat.

Men nädeýin, sen palçygmy ýuurdyä, Ýüň-ýüpegim baryn özüň egirddiň, Ýagşy-ýaman herne bizden çyksa-da, «Ýazgyt» diýip töweregme egirdň.

Meý guýaryn menlik gabyn özüne, Içerin ikisin yzly-yzyna, Ilki akla, dine üç talak berip, Soňra öýlenerin üzüm gyzyna.

Mydam meslik bolsun aşyklaň käri, Ýa perşan-diwana, bolmasyn ary, Saglykda her zadyň edýäs gamyny, Meslikde ne bolsa – bize bir bary.

Oýlanyp gör, başyň bolmasa haly, Öň näme getirdiň äkide ýaly, «Meý içmerin, ölüm bardyr» diýýärsiň, içseň-içmeseň-de ölersiň häli.

Şerap gup, ýeri däl her ýalan-çynyň, Bu gije meňkidir mäzleriň seniň, Geçeni, geljegi ýadyma salma, Pikrim – zülpüň ýaly çaşgyndyr meniň.

Taňry palçygmyzy eýlände başda, Her kime bir kysmat ýazanmyş başda, Meniň günälerim öz hökmi bolsa, Neçüýn magşar güni ýandyr ataşda.

Ýigitlik çagynda meý içen ýagşy, Hem içip, hüýr sypat ýar guçan ýagşy, Bu pany, wepasyz, harap dünýäde Wagtyň hoş, keýpiň kök şat geçen ýagşy.

Aý, ýyldyz döräli bäri adamzat, Görmediler meýden gowy hiç bir zat. Al şeraby satýanlara haýran men, Satyp näme alar, içgiden zyýat.

Bir küýzeçi gördüm düýn bazar güni, Palçygyň üstünden depýärdi göni. Bir zaryn ses bilen laý diýdi oňa: «Men-de sen ýalydym, horlama meni».

Bulut zar aglady gülzara gelip, Şerap iç, oturma saralyp-solup, Bu çemende bu gün biz oýnap gezsek, Erte çemenmizde kim gezer gülüp.

Diýýärler;Meretde meý içmek bijaý», Rejep aýynyä-da eýesi hudaý, Bu aýlar resuldyr, taňryňky bolsa, Oraz aý içeris – biziňki bu aý.

Dýnýäniň eşteri meý bilen sazdyr, Ýene bir ýagşy zat oňat owazdyr, Her näçe seretseň dýnýäň işine, Ýamanlyk bir gyşdyr, ýagşylyk ýazdyr.

Eý saky, meý getir, allaň haky üçin, Butlar döw, ýatyr allaň haky üçin, Sen dirilik suwy, biz teşne balyk, Bizi suwa ýetir, allň haky üçin.

Gaýgygamdan bir gün bolmadym azat, Bolmadym durmuşda bir salym hem şat, Köp zaman şägirdi bolup dünýäniň, Ahyr hem jahanda bolmadym ussat.

Göwnüm gulagyna söýledi pelek «Dünýäň işin menden görme, biderek», erkim bar bolsady bu dolanmakda, munça sergezdanlyk etmezdim gerek.

Her kimiň bar bolsa bir döwüm nany, Oturyp-turmaga bolsa mekany, Gul saklaman, gul hem bolman hiç kime, Ömür boýy şat geçirsin jahany.

Jahanda saýlantgy, eý zülpi tarym, Göz guwanjym, tende janym, sen barym, Eý söýgülim, jandan eziz bir zat ýok, Jandanda ýüz esse ezizsiň, ýarym.

Men bilmeýän taňry ýaradan wagty, Behiştmi, dowzahmy oň bellän bagty, Gülzarlykdameý, saz, gözel ýar bolsa, Nesýe behişt saňa – ber bu üç nagty.

Meý haram bolsa-da, içgin hemişe, Saz bilen içmegi edingin pişe, Damjasyn damdyrma, düýbüne çen iç, Düşäýse eliňe bir meýli çüýşe.