Omar Haýýam Rubagylar

Saky, ýeriňden tur, daň atdy, ine, Bulrury dolduryp, şerap bersene, Bu amanat demi pany dünýäde Her näçe gözleseň –tapmarsyň ýene.

Söýgülim, haýsy el ýaratdy seni Görküň utandyrdy aý şöhlesini, Gözeller baýram diýp ýüzün bezese, Sen ýüzüň husnundan bezeýäň ony.

Täze, köne meýiň biz hyrydary, Dünýäniň bahasy bir däne dary, Bilýärmiň öleňsoň gitjek ýeriňi? Her ýerik gitseň git – meý äber bäri.

Ýyrtyjy ýolbars dek awda barymyz, Elmydam hars urmak dert-azarymyz, Ähli işlermize bir-bir garalsa, Açyk belli bolar biziň kärimiz.

Bar, toprak at çarhy-pelek başyna, Meý içip, gözelleň aýlan daşyna, Gidenlerden bir hem gaýdyp gelen ýok, Ýeri däl meýl etmek tagat işine.

Biziň depdermizdem, jahan syrlary, Aýdylsa, ýagdyrlar dürli şerleri, Halkyň aň-bilimi ýetne bolansoä, Aýdyp bolmaz ýürekdäki barlary.

Däbimdir meý içip, hoş bolmak zyýat, Niýetim dinlerden bolmakdyr azat, Soradym galňyny dünýä gelniniň, Diýdi;Galňym şoldur bolsa köňlüň şat».

Dostumdyr-keseki eýlese wepa, Ýagymdyr-ýakynym ger berse jepa, Bal-eger ýakmasa, zäherdir maňa, Dermandyr – zäherden tapaýsam şypa.

Ertir ne boljagny bilmez adamzat, Başarsaň eýlegin däli köňli şat, Aýyň ýagtysyna meý iç, eý aýym, Soň bizi tapmaz ol, nur salyp zyýat. ===========0 Meýhanada…

Eý, başda ýanmaga bolan sezewar! Eý, öňden dowzaha edilen duçar! Rehim isläp haka ýüzlenme, Omar! Oňa sapak biýre näme hetdiň bar?

Geldim men dolanyp meçjide ine, Dogrusy, namaz diýp gelmedim ýöne, Ogurlapdym ozal bir namazlygy, Ol indi köneldi, geldim men ýene.

Gün ýagty salanda dünýä ýalbyrap, Şerap jamy dursun eliňde parlap, Diýýärler;dogry söz ajy bolarmyş», Şu delile görä – halaldyr şerap.

Hiç kime syryny diýmäýin pelek, Şalaryň başyna getirdi kelek, Şerap iç, gelmersiň gaýtadan dünýä, Ömür berilmeýär ikinji gezek.

Kim jahanda eden däldir gününi, Günäsizler neneň geçir jahany, Men günä gazansam, sen jeza berseň, Onda ikimiziň parhymyz hany?

Meniň elim kimin meý gutan eli Uzatmak gurhana ýaraşmaz weli, Sen gury sopy sen, men bir öl pasyk, Ot guryny ýakar – ol ýakmaz öli.

Meý içip, göwnümiz gel, şat edeliň, Gelerden-geçerden kem ýat edeliň, Gam laýyna batan bu ýesir göwni Akyl duzagyndan azat edeliň.

Ol ýyldyzlar bezeg berip asmana, Dogar, ýaşar, köp dolanar zamana, Asmanyň astynda, ýeriň üstünde, Hemişelik dogurmak bar ynsana.

Sanjylman bir tiken, galman azara, Ýetmedi dünýäde hiç kim gülzara, Daraga bak, dilim-dilim bolmazdan Hetdi ýokdur ýar zülpüni bezäre.

Soýulyk ylmyndan gaçan ýagşydyr, Bir ýaryň bilini guçan ýagşydyr, Dünýä ganymyzy içmezden ozal, Üzümiň ganyny içen ýagşydyr.

Tebigat her güli çykarsa ýerden, Ýene guma garyp, ýok edýär birden, Toprak bulut bolup asmana galsa, Aşyklaryň gany ýagar ýokardan.

Adamzatdyr ähli mahlugyň başy, Zyýadadyr onuň akyly-huşy, Dünýä tegelegi bir ýüzük bolsa, – Ynsandyr – bezegi, zynaty, gaşy.

Bilermiň horazlar her daňda-säher, Gygyryp, zarynlap gör näme diýer: «Daňyň aýnasynda görüm ömrüäden Bir gije geçdi seň, galdyň bihabar».

Bolandyr bizden öň gije hem gündiz, Aýlanandyr aýlar, günler durman tiz, Assa bas gadamyň, ol basan ýeriň Bir ýaryň gözünden tozap galan yz

Daryny duzakdan saýgarman ýürek Kä meçjide tarap, kä şerap gerek. Ömrüň meýhanada ýar bilen geçse, Meçjitde çüýränden ýegdir, biderek.

Dünýäde ýokary ylym alanlar, Yşyk dek dostlarna şöhle salanlar, Bu gara gijeden çykalga tapman, Ahyr ukadylar ýaňrap ýalanlar.

Eý köňül, dünýäniň syrna ýetmez sen Aňda akyllardan ozup – ötmez sen, Munda bir jennet gur meý bilen jamdan, Jennete ýa ýeter, ýa-da ýetmez sen.

Eý taňry, ol ýaryň jemalyn özüň, Bezäp-de, diýýärsiň: – Görmesin gözüň, «Bir doly käsäni gyşart-da, dökme!» diýene meňzeýär seniň bu sözüň.

Getirme başyňa boş hyýal hergiz, Dolduryp käsäni şerap iç tiz-tiz, Üzüm gyzy bilen hoş geçir wagtyň, Halal enesinden ýegdir haram gyz.

Günäkär bende men, keremiň hany Ýaraly göwnüme bir emiň hany? Tagatyň ýerine behişdi berseň, Bu biziň hakymyz – berimiň hany?

Iç, alymlar bilen ger içseň bada, Gül ýüzli bir zyba ýar bilen ýa-da, Köp içme, ýaňrama, adat edinme, Gizlin iç, käwagt, iç-içme zyýada.

Kim seni meslikde bize getiren, Perdeden çykaryp bärik ataran, Sensizde ýalyn dek ýananyň ýanna Kim seni ýüwürdip, ýel dek ýetiren.

menden soň bir ýeri dostlar at ediň, şol ýere ýygnanyp göwün şat ediň, saky uzadanda meý jamyn size, Omar pahyry-da şonda ýat ediň.

Meý içsem, sopular sagdan hem soldan, Diýýärler;Içmegin, çykarsyň ýoldan», Meý diniň ganymy-ganym ganyny Içmeklik dowadyr-içerin bolsan.

Ölemde meý bilen ýuwuň siz meni, Pata ýerne – içiň jaýlanan güni Kyýamatda meni tapjak bolsaňyz, Agtaryň meýhanaň ýanyndan göni.

Şat geçir, dünýäniň köpdür azary, Sansyz gonar-göçer Ýedigen bary, Seniň topragyňdan ýasalan kerpiç Başgalaň tamynyň bolar diwary.

Soýy bizçe bilmez keremin, alla, Bigäne tanyş dek, tanamaz, walla, – Günä etseň, jaýyň dowzahdyr – diýdiň, Sen bu sözüň sopa, işana ýollar.

Utanar zamana ol kesden aşa, Dünýä gamy üçin batsa gözýaşa, Göter pyýalany, aýdym-saz bilen Ömür pyýalamyz degmezden daşa.

Ajal okun atsa, galkanlar hiçdir, Ähli baýlyklara bakmaýan güýçdür, Her näçe syn etsem dünýäň işine, Ýagşylyk ýagşydyr – özgesi puçdur.

Bir bossana girip görse bir bilbil, Her ýanda ýylgyrýar meý jamy hem gül, Geldi-de, gulagma diýdi ýuwaşja: «Geçen dem tapdyrmaz, sen gadyryn bil!»

Bu çarhypelegiň zulumdyr işi, Maksada ýetmedi munda bir kişi, Her ýerde görse ol, bir dagly ýürek, Ýene bir dag basar, gyzdyryp çişi.

Däldirs biz şalaň täjine eýe Selläni bereris meýlise toýa, Hile leşgeriniň nyşany bolan, Tesbini satarys bir käse meýe.

Dünýä syrlaryna düşünjek bolup, Bihuda gam çekme, saralyp-solup, Şat geçir, bu jahan guralan wagty Etmediler saňa maslahat gelip.

Eý pelek, horluklar seniň kinäňden, Zulum hem kebr etmek – köne şiwäňden, Eý toprak, dilseler seniň bagryňy, Köp gymmat göwherler çykar synaňdan.

Eý taňry kerim sen, kerem köp sende, Neçüýn uçma barmaz günäkär bende, Tagat üçin geçseň – ol kerem bolmaz, Günämizi geçseň, kerim – sen şonda.

Getirme göwnüňe panydan bir gam, Tur, eý dost, ýeriňden – şat geçir bir dem Aslynda jahandan bolsady wepa, Nobat öňkülerden saňa ýetmez hem.

Gülüň möwsümidir, baga gideliň, Şerigata garşy bir iş edeliň, Gül ýaňakly ýarlar bilen şerapdan Göklügi gülzara öwrüp gaýdalyň.

Hüýr sypat bir gözel pasly-baharda, Çemenli gülzarda uzatsa bada, Adamlaň gözüne erbet bolsa-da, It boldugym – salsam behişdi ýada.

Köňül şatlygyndan galdy diňe at, Bize galan ýalňyz jam boldy, heýhat! Eliňi aýyrma küýzäň boýnundan, Galmady bir hemdem meýdan özge zat.

Meni getirmekden baý bolmaz pany, Ýa-da äkitmekden artmaz oň şany, Eştmedi hiç kimden iki gulagym: Getirmek – äkitmek neçüýn ynsany?

«Meý içýän» diýp, mese berme gyjalat, Hile torun gurma, aldawyň bes et, Sen gabarma «men meý içmeýän» diýip, Ýüz dürli iş edýäň meýden-de erbet.