وہ یقیں ہے نہ گماں ہے تننا ھُو یاھُو

وہ یقیں ہے نہ گماں ہے تننا ھُو یاھُو
جانِ جانانِ جہاں ہے تننا ھُو یاھُو
کون آشوب گرِ دیر و حرم ہے آخر
جو یہاں ہے نہ وہاں ہے تننا ھُو یاھُو
کس نے دیکھا ہے مکاں اور زماں کو یارا!
نہ مکاں ہے نہ زماں ہے تننا ھُو یاھُو
میں جو اک فاسق و فاجر ہوں جو زندیقی ہوں
رمزِ ’حق‘ مجھ میں نہاں ہے تننا ھُو یاھُو
کیا بھلا سود و زیاں، سود و زیاں کیا معنی
کچھ نہ ارزاں نہ گراں ہے تننا ھُو یاھُو
سینۂ وقت قیامت کا ہے چھلنی لیکن
نہ کمیں ہے نہ کماں ہے تننا ھُو یاھُو
مفلساں! دل سے خداوند تمہارے پہ دُرود
کیا ہی روزینہ رساں ہے تننا ھُو یاھُو
یہ جو منعم ہیں انھیں کا تو ہے فتنہ سارا
اور دین ان کی دکاں ہے تننا ھُو یاھُو
یار کا ناف پیالہ تو بلا ہے یاراں
حشر محشر طلباں ہے تننا ھُو یاھُو
خون ہی تھوک رہا ہوں میں بچھڑ کے اس سے
وہی تو رنگ رساں ہے تننا ھُو یاھُو
دھول اُڑتی ہے مری جان مرے سینے میں
دل مرا دشت فشاں ہے تننا ھُو یاھُو
جونؔ، میں جو ہوں کہاں ہوں، مجھے بتلا تو سہی
جون تو مجھ میں تپاں ہے تننا ھُو یاھُو
جون ایلیا