مرے من میں آ

مرے من میں آ
کبھی آ خیالوں کے سلسلوں سے نکل کے
حسنِ وجود میں
کبھی کواب چھوٹ کے جسم و جاں کے چلن میں آ
میں خیال و خواب کے سلسلوں کو ترے بغیر گزار دوں
تجھے تھام تھام کے دل کے ہاتھوں سے
چُوم چُوم کے دل کی آنکھوں کی روشنی سے سنوار دوں
ترے ایک پل پہ کئی زمانوں کو وار دوں
ترے ایک اشک پہ آنسوؤں کی قطار دوں
تری ایک جنبشِ آرزو پہ ہزار دوں
ترے نام پر
میں تو ایک نام کو زندگی کے ورق ورق سے اتار دوں
تجھے پیار دوں، تجھے پیار دوں
کبھی آ خیال کے سلسلوں سے نکل کے
حسنِ وجود میں
کبھی خواب چھوڑ کے جسم و جاں کے چلن میں آ
مرے مَن میں آ
مرے تَن میں آ
فرحت عباس شاہ