چو باران را گیاه تشنه، جانا، دوستت دارم

ز هم‌دیگر جدا هرگز نبودن آرزوی ماست
بمان تا جاودان، هم‎آرمانا، دوستت دارم

تو شیرین منی، این زندگانی با تو شیرین است
به حجم زندگی، ای هم‌زمانا، دوستت دارم

زمان چون کاروان پویاست سوی منزل فردا
منم هم‎پایت، ای هم‌كاروانا، دوستت دارم

اساس هم‌زبانی هم‌دلی بوده‌ست، شیرین‌جان
تو با من هم‌دلی، ای هم‌زبانا، دوستت دارم

قسم بر لحظه‌ها، هر لحظه با تو بودنم زیباست
قسم بر عشق، یار مهربانا، دوستت دارم
*
عبدالجبار سروش
*
Чу боронро гиёҳи ташна, ҷоно, дӯстат дорам!
Агар аз ташнагӣ мирам, ҳамоно дӯстат дорам.

Зи ҳамдигар ҷудо ҳаргиз набудан орзуи мост,
Бимон то ҷовидон, ҳамормоно, дӯстат дорам!

Ту Ширини манӣ, ин зиндагонӣ бо ту ширин аст,
Ба ҳаҷми зиндагӣ, эй ҳамзамоно, дӯстат дорам!

Замон чун корвон пӯёст сӯйи манзили Фардо,
Манам ҳампоят, эй ҳамкорвоно, дӯстат дорам!

Асоси ҳамзабонӣ ҳамдилӣ будаст, Ширинҷон!
Ту бо ман ҳамдилӣ, эй ҳамзабоно, дӯстат дорам!

Қасам бар лаҳзаҳо, ҳар лаҳза бо ту буданам зебост,
Қасам бар Ишқ, ёри меҳрбоно, дӯстат дорам!