جنوں کی حدوں سے گزرنا نہیں ہے

ہمارے مقدر میں جب تم نہیں تو
کسی کے لئے اب سنورنا نہیں ہے

مجھے صرف تم دیکھ سکتے ہو لیکن
گناہوں کی تہہ میں اترنا نہیں ہے

مجھے تم کھلونا سمجھتے ہو سمجھو
مجھے ٹوٹ کر اب بکھرنا نہیں ہے

یہ طے کر لیا ہے کسی حال میں بھی
تمناؤں کا خون کرنا نہیں ہے

میں جس کی ہوں اس کی رہوں گی ہمیشہ
کسی اور پر مجھ کو مرنا نہیں ہے

انا میں تو بہتی ہوئی اک ندی ہوں
کسی کے لئے بھی ٹھہرنا نہیں ہے

انا دہلوی