ہر گھڑی ہنسنا

غزل
ہر گھڑی ہنسنا ہنسانا یاد ہے
وہ حسیں دلکش زمانا یاد ہے
جانے کب بجلی گری کچھ یاد نیٔں
بن چکا تھا آشیانا یاد ہے
آتشِ فرقت میں جلنا روز و شب
اشک کا دریا بہانا یاد ہے
ہجر کی اُس چلچلاتی دھوپ میں
یاد کا وہ شامیانا یاد ہے
کوچۂ دلدار میں دیوانہ وار
رات دن چکّر لگانا یاد ہے
تیری دل جوئی کی خاطر بارہا
وہ حسیں نغمے سنانا یاد ہے
ملتے ہی آنکھوں سے آنکھیں یک بہ یک
وہ تِرا نظریں چرانا یاد ہے
مسکرا کر بات کرنا غیر سے
اور مِرے دل کو جلانا یاد ہے
تیرے استقبال کو ہر دن مِرا
راہ میں پلکیں بچھانا یاد ہے
ساحلِ دریا پہ تنہا بیٹھ کر
تیری تصویریں بنانا یاد ہے
یاد ہے راغبؔ وہ رغبت وہ جنوں
جان و دل اُس پر لٹانا یاد ہے
شاعر: افتخار راغبؔ
کتاب: خیال چہرہ