مِری وفاؤں پہ جس

غزل
مِری وفاؤں پہ جس کی وفا کا پہرا ہے
دیارِ دل پہ اُسی خوش ادا کا پہرا ہے
یہ اُس نے زُلف بکھیری ہے اپنے چہرے پر
کہ ماہتاب پہ کالی گھٹا کا پہرا ہے
درونِ گلشنِ ماضی پُکارتا ہے کوئی
سماعتوں پہ اُسی کی صدا کا پہرا ہے
ہمارا دل ہے اسیرِ جمالِ ہوش رُبا
خیال و فکر پہ حسنِ ادا کا پہرا ہے
ہے یاسمین کی خوشبو تمھاری زُلفوں میں
کہ دستِ ناز پہ بوئے حنا کا پہرا ہے
کسی کی جھیل سی آنکھوں میں ڈوبنے کے لیے
تڑپ رہا ہوں کہ ان پر حیا کا پہرا ہے
غزل میں عکس نمایاں اُسی کا ہے راغبؔ
متاعِ درد پہ جس دل رُبا کا پہرا ہے
شاعر: افتخار راغبؔ
کتاب: لفظوں میں احساس