لفظوں میں تِرے حسن

غزل
لفظوں میں تِرے حسن کی تنویر بسا لوں
اے کاش کہ اشعار کی توقیر بڑھا لوں
خوش بو سے تراشوں میں ترے حسن کا پیکر
رنگوں سے گلوں کے تِری تصویر بنا لوں
وہ خواب دے مجھ کو جو مِری نیند اُڑا دے
وہ عزم کہ ہر خواب کی تعبیر چُرا لوں
ظالم سے لڑوں گا میں قلم ہاتھ میں لے کر
دشمن کی یہ کوشش ہے کہ شمشیر اُٹھا لوں
کس طرح ملاقات کی نکلے کوئی صورت
کس طرح میں سوئی ہوئی تقدیر جگا لوں
جب دل سے نکلتا ہی نہیں خوف تو راغبؔ
کیا گردن و پا میں پڑی زنجیر نکالوں
مئی ۲۰۱۰ء طرحی
شاعر: افتخار راغبؔ
کتاب: غزل درخت