کوئی شیشہ نہ پتھّر

غزل
کوئی شیشہ نہ پتھّر ہے مِرا دل
محبّت کا سمندر ہے مِرا دل
مِرے سینے کے اندر ہے مِرا دل
مگر قابو سے باہر ہے مِرا دل
مِرا دل میری ہستی کا خزینہ
مِری دنیا کا محور ہے مِرا دل
مکیں اِس کو ملا ہے تیرے جیسا
مقدّر کا سکندر ہے مِرا دل
کبھی رسوا اِنہیں ہونے نہ دے گا
تمنائوں کی چادر ہے مِرا دل
کوئی شاہین ہے میرا تخیّل
اُسی شاہیں کا شہپر ہے مِرا دل
ہے صبر و شکر کا کوئی لبادہ
کہ درد و غم کا پیکر ہے مِرا دل
چلیں کچھ آپ بھی کردیں عنایت
بڑا ہی درد پروَر ہے مِرا دل
کسی کی یاد کی خوش بو سے راغبؔ
ہر اِک لمحہ معطّر ہے مِرا دل
شاعر: افتخار راغبؔ
کتاب: لفظوں میں احساس