عشق کے رمز و

غزل
عشق کے رمز و اِشارے ہیں جدا
ناز و انداز تمھارے ہیں جدا
اُن کی چاہت ہے عذابوں کی طرح
جن کی قسمت کے ستارے ہیں جدا
ماں کو دیتا ہوں تسلّی کہ یہاں
کتنی ہی مائوں کے پیارے ہیں جدا
غم نہ کرنا ہو خسارہ بھی اگر
یہ محبّت کے خسارے ہیں جدا
دوست، احباب، وطن، اپنوں سے
کتنے حالات کے مارے ہیں جدا
ایسے راغبؔ وہ جدا ہیں مجھ سے
جیسے دریا کے کنارے ہیں جدا
شاعر: افتخار راغبؔ
کتاب: لفظوں میں احساس