دلِ بیتاب کی نقلِ

غزل
دلِ بیتاب کی نقلِ مکانی یاد آتی ہے
مِری معصوم چاہت کی کہانی یاد آتی ہے
جہانِ جسم و جاں کی شادمانی یاد آتی ہے
مِرے دل پر تِری وہ حکمرانی یاد آتی ہے
جوانی کے حسیں موسم میں بچپن یاد آتا ہے
جوانی جب نہیں رہتی جوانی یاد آتی ہے
یوں لگتا ہے کہ سینے سے کلیجہ آ گیا باہر
دلِ خوش فہم کی جب خوش گمانی یاد آتی ہے
ہمیشہ یاد آتا ہے کسی کا شبنمی لہجہ
کسی کی ہر گھڑی شیریں بیانی یاد آتی ہے
عذابِ یادِ ماضی میں پھنسی ہے زندگی میری
سو ہر لمحہ تِری اِک اِک نشانی یاد آتی ہے
کھِلا کرتی تھیں جب راغبؔ کسی کی دید کی کلیاں
بہارِ وصل کی وہ رُت سُہانی یاد آتی ہے
شاعر: افتخار راغبؔ
کتاب: لفظوں میں احساس