میری ہر بات پہ حیران نہ

میری ہر بات پہ حیران نہ ہونا پاگل
کچھ بھی ہو جائے پریشان نہ ہونا پاگل
جیسے میں ٹوٹے ہوئے خواب لیے پھرتا ہوں
اس طرح تم کبھی ویران نہ ہونا پاگل
لوگ پھر اور مصائب میں دھکیلیں گے تمہیں
ہر کسی کے لیے آسان نہ ہونا پاگل
تیری وسعت مجھے تسکین عطا کرتی ہے
سبز ہی رہنا بیابان نہ ہونا پاگل
میں نہ ہو کر بھی سدا پاس رہوں گا تیرے
مطمئن رہنا پریشان نہ ہونا پاگل
ایسے تنہائی میں رہ کر نہ گنوانا خود کو
اپنے ہی واسطے نقصان نہ ہونا پاگل
زین شکیل