اے وطن

اے وطن
رنگ و فرہنگ و آہنگ کی انجمن
اے وطن! اے وطن! اے وطن! اے وطن
ارتقائے تمّدن کا عنواں ہے تُو
یعنی منجملہِ مصر و یوناں ہے تُو
رہبرِ عہدِ نو تیرا عہدِ کُہن
اے وطن، اے وطن، اے وطن، اے وطن
تُو نے پھیلائی عرفان کی روشنی
علم و حکمت کے ایوان کی روشنی
تیری تاریخ ہے مظہرِ فکر و فن
اے وطن! اے وطن! اے وطن! اے وطن
سر بہ سر جلوہ گاہِ بہاراں ہے تُو
ذرّہ ذرّہ ترا جنتِ آرزو
نازشِ گلستان تیرے دشت و دمن
اے وطن! اے وطن! اے وطن! اے وطن
تجھکو عنوانِ ہستی بنائیں گے ہم
زندگی بھر ترے گیت گائیں گے ہم
رونقِ بزمِ جاں ہے ترا بانکپن
اے وطن! اے وطن! اے وطن! اے وطن
جون ایلیا