سلسلہء جنباں شام ہے کس کی، شکوہ کناں ہے کس کی شام

سلسلہء جنباں شام ہے کس کی، شکوہ کناں ہے کس کی شام
ہم تو گماں برباد ہی ٹھہرے، شام گماں ہے کس کی شام
اس میدان شکست جاں میں کون بچا زندہ جانے
کیا جانے اس شہرِ عبث میں کس کا زیاں ہے کس کی شام
آج کہاں کیسا موسم ہے جسم و جاں کی بستی میں
شبنم شبنم جسم ہے کس کا، شعلہ بجاں ہے کس کی شام
شام کا شہر نا پرساں ہے اور بازاروں کا آشوب
پرسس جاں، تیرے قریے میں فرحت جاں ہے کس کی شام
گم ہوئی اپنی خوش گزرانی کوچہ دل نا پرساں میں
کوچہ دل پرساں میں نہ جانے، خوش گزراں ہے کس کی شام
جون ایلیا
Share:

Leave a Reply

Your email address will not be published. Required fields are marked *