ہم محبت میں خجل بھی رہے نازاں بھی رہے

ہم محبت میں خجل بھی رہے نازاں بھی رہے
اُن کی حسرت بھی رہی ، اُن سے گریزاں بھیرہے
عُمر بھر ماتمِ حالات سے فرصت نہ ملی
عُمر بھر مطربِ خلوت گہِ خوباں بھی رہے
پیشِ اغیار رکھی وضعِ تکبّر قائم
اور احباب کے شرمندہء احساں بھی رہے
شہر ساقی میں رہا دلق فروشی پر مدار
اور اسی شہر میں سر حلقہِ رنداں بھی رہے
ہم کہ انکار عقیدہ ہے ہمارا شیوہ
ہم ہی خود معتقدِ چشم غزالاں بھی رہے
ہر طرح ہم نے ترے دل کو دُکھایا اے شخص
ہر نفس اپنی شقاوت پہ پشماں بھی رہے
مدتوں اُن کے تصور میں گزاریں راتیں
مدتوں اُن کے تصور سے گریزاں بھی رہے
عرشہءمنبرِ واعظ کو بھی زینت بخشی
مسند آرائے شبستانِ نگاراں بھی رہے
جون ایلیا