تنہائی

تنہائی
مری شام غم مری شام غم
مرے پاس آ مجھے راس آ
جو سفر پڑا مجھے روز و شب کی فصیل پر
مری پور پور میں درد بن کے اتر گیا
جو کہیں کہیں پہ پڑاؤ تھا مرا آبِ اشک کی جھیل پر
ترے جیسے ہی کسی خیر خواہ سے کم نہ تھا
کبھی راکھ تھا کسی مُردہ دل سے وصال کی
تو کبھی الاؤ تھا بے قراریِ ہجر کا
کسی شہرِ صبر کی سیج پر
جو سکوت تھا مرا عمر بھر
کسی بین سے کسی سرد آہ سے کم نہ تھا
کبھی خار دیکھے ہیں تم نے نیند کے بستروں پہ اُگے ہوئے
مری آرزو تو تھی آرزو
مرا خواب بھی کسی قتل گاہ سے کم نہ تھا
مری انگلیاں بھی ہیں ریشہ ریشہ جمود سے
مری خواہشیں مرا دشتِ دل
مری چاہتیں مری چشمِ نم، مری چشمِ نم
مری شامِ غم، مری شام غم
مرے پاس آ، مجھے راس آ
میں نجانے کیسی اذیتوں کی رفاقتوں میں الجھ گیا
میں اُلجھ گیا کسی عہدِ حالتِ زار سے
کسی پیار سے کوئی سچ نکل کے نہیں ملا
وہی زرد رُت، وہی زرد رُت
وہی برف سی مرے ہم قدم
مری شامِ غم مری شام غم
مرے پاس آ مجھے راس آ
فرحت عباس شاہ
(کتاب – دکھ بولتے ہیں)
Share:

Leave a Reply

Your email address will not be published. Required fields are marked *