دیواروں کے کان

دیواروں کے کان
مندروں، مسجدوں اور کلیساؤں میں بدی کے خلاف وعظ کرنے والو
اسمبلی ہالوں اور جلسے جلوسوں میں جذباتی تقاریر کرنے والو
اپنے اپنے بستروں کی بغلوں میں دبا کر
دنیا کے دور دراز علاقوں تک حق بات پھیلانے کے لئے سفر کرنے والو
اپنے سفید بالوں کے واسطے دے دے کر
نوعمروں کو امن اور نیکی کی تلقین کرنے والو
ٹی وی کیمروں
اور صحافیوں کے پینلز کے سامنے بیٹھ کر
قوموں کے دکھ بیان کرنے والو
ٹی ہاؤسز اور رنگا رنگ تقاریب میں
چائے کے کپوں اور سگریٹ کے دھوئیں کے درمیان
انسانیت کے پیچیدہ مسائل زیر بحت لانے والو
میگزینوں اور کتابوں میں
نفرت سے نفرت اور محبت سے محبت کا پرچار کرنے والو
اگر کوئی تمہارے گھروں کی دیواروں سے
تمہارے بارے میں سچ سچ پوچھ لے تو۔۔۔؟
فرحت عباس شاہ