رات آنکھوں کی طرح بھیگ چلی

رات آنکھوں کی طرح بھیگ چلی
رات آنکھوں کی طرح بھیگ چلی
دل کے ساحل پہ سر شام ترا غم رویا
لے گئی بھر کے ہوا دامن کو
بادلوں کا بھی کوئی اپنا سفر ہوتا ہے
جانے کس دشت پہ سستائیں
کہاں جا برسیں
رات آنکھوں کی طرح بھیگ چلی
تیرا دھندلایا ہوا عکس اتر آیا ہے
رات کی اجڑی ہوئی مانگ پہ خاموش پرندے کی طرح
اے مری یاد کے آباد نگر
کیسی بارش میں نہا آئے ہو
آنکھ جھپکوں کہ ترے جسم کی نمناک ردائیں سوکھیں
خشک ہو جائے ترا بھیگا ہوا پیراہن
آنسوؤں کی بھی کوئی اپنی ادا ہوتی ہے
دل کے ساحل پہ سر شام ترا غم رویا
رات آنکھوں کی طرح بھیگ چلی
آنکھ برسے کہ یہ دریا کا سفر تھم جائے
فرحت عباس شاہ
(کتاب – ملو ہم سے)