مار دو۔۔۔۔۔ مار دو

مار دو۔۔۔۔۔ مار دو
اِسے پکڑو پکڑو۔۔۔۔
گِرا دو۔۔۔۔۔ مار دو
میں کسی بلند پہاڑ کی کسی ڈولتی ہوئی
ہلتی جُلتی چٹان پر
بڑی مشکلوں سے ٹکا ہوا ہوں
ابھی گرا کہ ابھی گرا
اسے پکڑو پکڑو۔۔۔۔۔
گرا دو۔۔۔۔۔
مار دو۔۔۔۔۔۔۔۔ مار دو
مرے نیچے دور سے دور تک
کئی سو ، ہزار، کروڑ لوگ جو چیونٹیوں کی طرح
بلندی سے لگ رہے ہیں زمین پر
بڑی گونج دار صدائیں ہیں
بڑی بازگشت ہے آسماں سے زمین تک
جو ہلا رہی ہے پہاڑ کو
مرا دل دہلتا ہے ڈولنے سے چٹان کے
مرے پیر میرے ہی عرق پر ہیں پھسل رہے
مری جان میرے لہو پہ جم ہی نہیں رہی
مرا دل دھڑکتا ہے آکے میرے دماغ میں
میں بھی کہہ رہا ہوں
کہ پکڑو، پکڑو، گرا دو، مار دو، مار دو۔۔۔۔
میں بھی کہہ رہا ہوں
یہ سوچتا
کسے پکڑو پکڑو گرا دو مار دو مار دو
فرحت عباس شاہ