پئے نذرِ کرم تحفہ ہے شرمِ نا رسائی کا

پئے نذرِ کرم تحفہ ہے شرمِ نا رسائی کا
پئے نذرِ کرم تحفہ ہے شرمِ نا رسائی کا
بہ خوں غلطیدہ صد رنگ، دعویٰ پارسائی کا
نہ ہو حسنِ تماشا دوست رسوا بے وفائی کا
بہ مہرِ صد نظر ثابت ہے دعویٰ پارسائی کا
جہاں مٹ جائے سعیِ دیدخضر آبادِ آسایش
بجیبِ ہر نھہ پنہاں ہے حاصل رہنمائی کا
بہ عجز آبادِ وہمِ مدّعا تسلیمِ شوخی ہے
تغافل یوں نہ کر مغرور تمکیں آزمائی کا
زکاتِ حسن دے، اے جلوہ بینش، کہ مہر آسا
چراغِ خانۂ درویش ہو کاسہ گدائی کا
نہ مارا جان کر بے جرم، غافل! تیری گردن پر
رہا مانند خونِ بے گنہ حق آشنائی کا
تمنائے زباں محوِ سپاسِ بے زبانی ہے
مٹا جس سے تقاضا شکوہ بے دست و پائی کا
وہی اک بات ہے جو یاں نفس واں نکہتِ گل ہے
چمن کا جلوه باعث ہے مری رنگیں نوائی کا
دہانِ ہر “بتِ پیغاره جُو”، زنجیرِ رسوائی
عدم تک بے وفا چرچا ہے تیری بے وفائی کا
نہ دے نامے کو اتنا طول غالبؔ، مختصر لکھ دے
کہ حسرت سنج ہوں عرضِ ستم ہائے جدائی کا