شفق بدعوئِ عاشق گواهِ رنگیں ہے

شفق بدعوئِ عاشق گواهِ رنگیں ہے
شفق بدعوئِ عاشق گواهِ رنگیں ہے
کہ ماه دزدِ حنائے کفِ نگاریں ہے
کرے ہے باده، ترے لب سے، کسبِ رنگِ فروغ
خطِ پیالہ، سراسر نگاهِ گلچیں ہے
کبھی تو اِس سرِ شوریده کی بھی داد ملے!
کہ ایک عُمر سے حسرت پرستِ بالیں ہے
بجا ہے، گر نہ سُنے، نالہ ہائے بُلبلِ زار
کہ گوشِ گُل، نمِ شبنم سے پنبہ آگیں ہے
عیاں ہے پائے حنائی برنگِ پرتوِ خورشید
رِکاب روزنِ دیوارِ خانۂ زیں ہے
جبینِ صبح، امیدِ فسانہ گویاں پر
درازئِ رگِ خوابِ بتاں خطِ چیں ہے
ہوا نشانِ سوادِ دیارِ حسن عیاں
کہ خط غبارِ زمیں خیزِ زلفِ مشکیں ہے
اسدؔ ہے نزع میں، چل بیوفا! برائے خُدا!
مقامِ ترکِ حجاب و وداعِ تمکیں ہے
نہ پوچھ کچھ سر و سامان و کاروبارِ اسدؔ
جنوں معاملہ، بے دل، فقیرِ مسکیں ہے