ہر قدم دورئِ منزل ہے نمایاں مجھ سے

ہر قدم دورئِ منزل ہے نمایاں مجھ سے
ہر قدم دورئِ منزل ہے نمایاں مجھ سے
میری رفتار سے بھاگے ہے، بیاباں مجھ سے
درسِ عنوانِ تماشا، بہ تغافلِ خُوشتر
ہے نگہ رشتۂ شیرازہ مژگاں مجھ سے
وحشتِ آتشِ دل سے، شبِ تنہائی میں
صورتِ دُود، رہا سایہ گُریزاں مجھ سے
غمِ عشاق نہ ہو، سادگی آموزِ بُتاں
کِس قدر خانۂ آئینہ ہے ویراں مجھ سے
اثرِ آبلہ سے، جادہ صحرائے جُنوں
صُورتِ رشتۂ گوہر ہے چراغاں مجھ سے
!بیخودی بسترِ تمہیدِ فراغت ہو جو
پُر ہے سایے کی طرح، میرا شبستاں مجھ سے
شوقِ دیدار میں، گر تُو مجھے گردن مارے
ہو نگہ، مثلِ گُلِ شمع، پریشاں مجھ سے
بیکسی ہائے شبِ ہجر کی وحشت، ہے ہے!
سایہ خُ ورشیدِ قیامت میں ہے پنہاں مجھ سے
گردشِ ساغرِ صد جلوہ رنگیں، تجھ سے
آئینہ دارئ یک دیدہ حیراں، مُجھ سے
نگہِ گرم سے ایک آگ ٹپکتی ہے، اسدؔ!
ہے چراغاں، خس و خاشاکِ گُلستاں مجھ سے