صاف ہے ازبسکہ عکسِ گل سے گلزارِ چمن

صاف ہے ازبسکہ عکسِ گل سے گلزارِ چمن
صاف ہے ازبسکہ عکسِ گل سے گلزارِ چمن
جانشینِ جوہرِ آئینہ ہے خارِ چمن
ہے نزاکت بس کہ فصلِ گل میں معمارِ چمن
قالبِ گل میں ڈھلی ہے خشتِ دیوارِ چمن
برشگالِ گریۂ عشاق دیکھا چاہیے
کھل گئی مانندِ گل سو جا سے دیوارِ چمن
تیری آرائش کا استقبال کرتی ہے بہار
جوہرِ آئینہ ہے یاں نقشِ احضارِ چمن
بس کہ پائی یار کی رنگیں ادائی سے شکست
ہے کلاهِ نازِ گل بر طاقِ دیوارِ چمن
الفتِ گل سے غلط ہے دعوئِ وارستگی
سرو ہے باوصفِ آزدی گرفتارِ چمن
وقت ہے گر بلبلِ مسکیں زلیخائی کرے
یوسفِ گل جلوه فرما ہے بہ بازارِ چمن
وحشت افزا گریہ ہا موقوفِ فصل گل اسدؔ
چشمِ دریاریز ہے میزابِ سرکارِ چمن