Дар ҳар куҷо садоқати ман кор мекунад, – Лоик Шерали

Дар ҳар куҷо садоқати ман кор мекунад,
Азми ману матонати ман кор мекунад.
Дар сохтмони Нораку Роғон на шасти об,
Он ҷо дилу муҳаббати ман кор мекунад.
Дар коргоҳи арзизу дар дастгоҳи барқ
Ихлоси ман, иродати ман кор мекунад.
Он ҷо, ки ихтилофи касифу шариф ҳаст,
Оҳи ману наҷобати ман кор мекунад.
То он даме, ки одамӣ дорад талоши адл,
Инсофи ман, адолати ман кор мекунад.
Рӯзе зи дасти моҳири ман уфтад қалам,
Бе дасти ман маҳорати ман кор мекунад.
Фардо агарчи нестам мобайни зиндагон
Дар гӯр ҳам футуввати ман кор мекунад.
[1982]