Дилам месӯзад имшаб аз ғами ҷонсӯзи маҳҷурӣ, – Лоик Шерали

Дилам месӯзад имшаб аз ғами ҷонсӯзи маҳҷурӣ,
Дилам мегиряду мегиряд аз тақдири маҷбурӣ.
Туро дидам, басо дидам, вале нашнохтам, афсӯс,
Ҳам аз ин чашми бино доду ҳам фарёд аз ин кӯрӣ!
Бирафтам аз канори ту, канори пурбаҳори ту,
Баҳорат бехазон бодо, гули сурӣ, гули сурӣ!
Гумонам буд ишқи мо ба мо моро қарин созад,
Қарини дардҳоям кард охир қисмати дурӣ.
Кунун бе офтоби рӯи ту рӯзам сияҳ бошад,
Дили равшан куҷо ҷӯям ба торикию бенурӣ!
Зи тори дил кунун ҷуз нағмаи дарҳам намеояд,
Худовандо, чӣ бешӯрӣ, худовандо, чӣ ноҷӯрӣ!
[1982]