Гар Деву Парӣ Ҳорис Бо Теғу Сипар Бошад – Мавлоно Ҷалолуддини Балхӣ

Гар деву парӣ ҳорис бо теғу сипар бошад,
Чун ҳукми Худо ояд, он зеру забар бошад.
Бар ҳарчи умедастат, кай гирад ӯ дастат?!
Бар шакли асо ояд в-он мори дусар бошад!
В-он ғусса, ки мегӯйӣ: “Он чора накардам дӣ!”,
Ҳар чора, ки пиндорӣ, он низ ғурар бошад.
Худ карда шумар онро, чӣ хезад аз он савдо,
Андар пайи сад чун он сад доми дигар бошад!
Он чора ҳамекардам, он мот намеомад,
Он чораи лангатро охир чӣ асар бошад?!
Аз мот ту қуте кун, ёқут шав ӯро ту,
То ӯ ту шавӣ, ту ӯ, ин ҳисну мафар бошад!