Дар Шаҳри Шумо Яке Нигорест – Мавлоно Ҷалолуддини Балхӣ

Дар шаҳри шумо яке нигорест,
К-аз вай дилу ақл беқарорест!
Ҳар нафсеро аз ӯ насибест,
Ҳар боғеро аз ӯ баҳорест!
Дар ҳар кӯйе аз ӯ фиғонест,
Дар ҳар роҳе аз ӯ ғуборест!
Дар ҳар гӯше аз ӯ самоъест,
Ҳар чашм аз ӯ дар иътиборест!
Дар кор шавед, ай ҳарифон,
К-ин ҷо моро азим корест!
Пинҳон ёре ба гӯши ман гуфт,
К-ин ҷо пинҳон латиф ёрест!
Ӯ буд, ки ба ин тариқ мегуфт,
К-аз таъбияҳош дил низорест!
Ӯ буд расули хешу мурсал,
К-он лаҳҷа аз они шаҳрёрест!
Навҳа-сту амони ғарқагон аст,
Рӯҳ асту ниҳону ошкорест!
Гирди турушон магард з-ин пас,
Чун паҳлуи ту шакарнисорест!
Гирди шакарони табъ кам гард.
К-он шаҳват низ баргузорест.
Ин ҷо шакарест бениҳоят,
Ин ҷо сари вақти пойдорест!
Хомӯш кун, ай дилу мапиндор,
К-ӯро ҳаддест ё канорест!